Issittumi alapernaarsuutitaassaq 2018-imi atulissaaq

Sakkutuut imarsiortut marlunnik sinerissami nakkutilliissuteqareerput tassaasunik Knud Rasmussen aamma Ejnar Mikkelsen.

Umiarsuaq alapernaarsuut nutaaq, siulimisut angissuseqartussaq, 2016-imi naammassillugu sananeqarnissaa naatsorsuutigineqarpoq, issittullu imartaani 2018-imit alapernaarsuilernissaa naatsorsuutigineqarluni.

Illersornissamut ministerip Nicolai Wammenip allagaa tunngavigalugu atuagassiaq Ingeniøren taama ilisimatitsissuteqarpoq.

Illersornissamut isumaqatigiissut maanna atuuttoq naapertorlugu alapernaarsuut sananeqassaaq, 513 millionit koruuninillu akeqartussatut naatsorsuutigineqarluni.

Alapernaarsuutip nutaap kutteri alapernaarsuut Tulugaq taarsissavaa, Illersornissamullu ministeeriap allagaa naapertorlugu amerlanerusunik suliaqartinneqarsinnaassalluni, soorlu aalisarnermik nakkutilliinermik aamma mingutsitsinermik akiuiniarnermut atorneqarsinnaassalluni.

Umiarsuit alapernaarsuutit nunani tamalaani pisariaqartitsineq naapertorlugu aamma atorneqarsinnaapput.

Alapernaarsuutit qulimiguulinnut mittarfeqarput, qulimiguulinnulli inissiiveqaratik. Qulimiguullit taamaalillutik alapernaarsuutinut missinnaapput, taamaattorli alapernaarsuutit aalajangersimasumik qulimiguulimmik peqaratik.

Alapernaarsuutit 76 mm-imik sullulimmik qamutileqarput aamma uuliakoortoqassagaluarpat assiaqutsersuutissanik atortulersugaallutik kiisalu misissuinernut atortorissaaruteqarput immallu itissusaannut uuttuuteqarlutik.