Issittormiut Illuat sananialerpaat
Geoff Green Issittormiut illuannik sananissamik pilersaaruteqartuuvoq, siku imaluunniit sermeq pillugu ilinniartitsinermik taasamik Students on Icemik aqutsisuulluni.
Geoff Greenip, inuusuttut issittoq pillugu ilisimasaqarnerulernissaannik ukiorpassuarni suliniuteqartuuvoq.
Issittormiut illuanni sananeqartussatut pilersaarutigineqartumi, katersugaasiveqarnissaa eqqumiitsuliortunillu atorneqarnisaa pilersaarutigineqarpoq, soorluttaaq ilinniagaqartut aaqqissuussisarnissaannik, saqqummersitsinernullu atorneqarnissaa takorloorneqarluni.
Issittormiut illuat Ottowami sananeqarpat, atuartut 200.000-it ukiut tamaasa illumut takuniaasarnissaat Geoff Greenip eqqoriarpaa.
Illu 25 millionit koruuninik akeqassaaq. Aningaasat pisariaqartinneqartut ilaannik Geoff Green pissarsereersimavoq, neriuutigineqarporlu illu ukiut marluk ingerlanneranni ammarneqarumaartoq.
