Issittoq pillugu periusissiartaaq kiisami saqqummiunneqalertoq
Nunatta nunanut allanut, sillimaniarnermut illersornissamullu politikkikkut periusissiartaava pingasunngornermi atsioqatigiissutigineqarlunilu saqqummiunneqassaaq.
Naalakkersuisut tamanna KNR-imut pingasunngornermi uppernarsarpaat.
Naalakkersuisut illuatungiliuttullu periusissiartaaq marlunngornermi naammassigaat, Demokraatineersup Nivi Olsenip oqaatigaa.
- Periusissiartaaq naammasigimaarparput, taannalu nunatsinni illersornissamut sillimaniarnermullu tunngavissaalluartoq isumaqarpugut, Nivi Olsen KNR-imut oqarpoq.
Nunanut allanut, sillimaniarnermut illersornissamullu politikkikkut periusissiaq, Issittoq pillugu periusissiamik aamma taaneqartartoq, qanoq imaqarnersoq pisortatigoortumik suli nalunaarutigineqanngilaq.
Periusissiarli taanna tusagassiortunik pingasunngornermi ullaap tungaani aqqanermut katersortitsinermi saqqummiunneqassaaq.
- Illersornissamut isumaqatigiissut una sivisuumik utaqqinikuuarput, taannalu nunatsinnut isumaqartorujussuuvoq, aamma nipimik taama ersaritsigisumik anitsinissamik piffissanngorpoq, Nivi Olsen oqarpoq.
Issittoq pillugu periusissiaqarnissarput atorfissaqartilluinnarparput
Nunanut allanut sillimaniarnermullu periusissiartaaq ukiorpaalunni suliarineqarpoq. Periusissiartaap siulia 2011-mi suliarineqarpoq, 2020-milu atorunnaarluni.
Kunngeqarfik Danmark ataatsimoorussamik Issittoq pillugu periusissiaqassappat
Kalaallit Nunaata nunanut allanut tunngasunut periusissiaa pisariaqartinneqarpoq.
Periusissiartaaq Danmarkip ukiorpaalunni erinitsaassaa maanna tassa saqqummiunneqarsinnaanngorpoq.
- Naalagaaffeqatigiinni illoqarfiit pingaarnerit pingasut suleqatigiillutik suliaannik Issittoq pillugu periussissiaqarnissarput atorfissaqartilluinnarparput, Danmarkip nunanut allanut ministeria Lars Løkke Rasmussen (Moderaterne) Folketingimi oqaluttarfimmi 2023-mi marsimi oqarpoq.
Nutaarsiassaqartitsiviup Altinget Arktisip periusissiamut missingiut tamanut saqqummiussinermini ilaatigut allaaseraa Amerika Avannarleq Issittumilu inuiaqatigiit allat suleqatigineqarnerulerniartut, Kangianilu nunat aamma aallutarineqarneruniartut, sakkutuujusussaatitaanerlu nunatsinni eqqunneqassanersoq pillugu oqallittoqarnissaanik ammaasilluni.
Amerika Avannarleq Issittumilu inuiaqatigiit allat suleqateqarnerulernissaq, Kangiani nunat aamma aallutarinerunissaat sakkutuujusussaatitaanerullu nunatsinni eqqunneqarnissaanik oqallinnerunissaq salliunneqarniartunut ilaasut, nutaarsiassaqartitsiviup Altinget Arktisip periusissiamut missingiummik tamanut saqqummiussinermini ilaatigut allaaseraa.
