Issittoq pillugu ilisimasassarsiuut tikippoq
Umiarsuaq sikusiut Oden svenskit danskillu issittoq pillugu ilisimasassarsiutaat Kalaallit Nunaata eqqaani qaammatini arfinilinni angalareerluni ullumi Svalbardimut tikippoq.
- Immap naqqata misissuiviginerata ilaa maanna naammassisimalerpoq, angerlaanneqartullu qarasaasiamut immiussorneqarsimasut tusarnissaat assut isumalluarfigaakka, taakkuami inerneri tunngaviullutik Kalaallit Nunaata imartaata 2014-p tungaanut misissorneqarnissaa pilersaarusiorneqartussanngussaaq, taama oqarpoq danskit ilisimatusarneq pillugu ministeriat Helge Sander.
Umiarsuulli Odenip angalanera oqitsuinnaasimanngilaq tassami Kalaallit Nunaata avannaarsuani Lomonosov ryggenimi sikoqangaarmat paasissutissanik qarasaasiamut katersiniarneq ajornakusoorsimaqimmat, taamaalillunilu uuttortaaniarnerigaluit arlallit ajutoortariaqalersimallutik.
Taamaakkaluartorli umiarsuup Odenip suliamut pingaaruteqarluartut arlallit qarasaasiamut katersorsimagai unnersiutigineqarpoq.
