Issittoq pillugu Danmarkimi ilisimasaqarfeqalernissaa ujartorpaat
Aarhus Universitetimi siunnersortaaneq Morten Rasch, aamma tusagassioq atuakkiortorlu Martin Breum, aviisimut Politikenimi allaaserisaminni ilaatigut oqaatigaat Issittoq pillugu ilisimasaqarfimmik pilersitsisoqartariaqartoq:
- Issittoq pillugu ilisimasaqarfiup saniatigut, Issittoq pillugu ilisimatusarnermi periusissat pillugit pilersaarutinik ataqatigiissaakkanik pisariaqartitsisoqarpoq, Issittoq pillugu immikkut ilisimasalinnik ilinniarsinnaanissamut periarfissat pitsaanerulersinneqartariaqarlutik. Siunissaq eqqarsaatigalugu isumannaarinninnissaq maannangaaq pisariaqartinneqarluinnarpoq, Morten Rasch aamma Martin Breum Politikenimi ilaatigut allapput.
Dansk Polarcenter, Issittoq pillugu nunani tamaalni ilisimatusartut tupigusuutigeqisaannik 2009-mi februaarip aallaqqaataani matuneqarpoq.
Issittoq pillugu Kalaallit Nunaanni ilisimatusarnerup nukittorsarneqarnissaa, ilisimalikkallu aaqqissugaanerusumik katersorneqarnissaat matumani anguniagaagunartoq, Morten Raschip Martin Breumillu oqaatigaat, naallu Pinngortitaleriffik, Silallu pissusia pillugu ilisimatusarfik ingerlalluaraluartut, tamanna naammanngilaq, oqarput:
- Issittumi ineriartupiloortoqarnera eqqarsaatigalugu, inuussutissarsiutitigullu periarfissat sikup aakkiartorneratigut annertusiartuinnavissappata, taava ilinniarsimasunik pisariaqartitsisoqalissaaq. Tamanna eqqarsaatigalugu Issittoq pillugu ilisimatusarnermi ilinniartitaanermilu periarfissat nammanngillat, piorsaasoqartariaqarlunilu, Morten Rasch aamma Martin Breum oqarput.