Issittoq pillugu Aarhusimi ataatsimeersuartoqalerpoq
Kyotomi isumaqatigiissutip taartissaani suut ilaatinneqassanersut ataatsimeersuarnermi immikkut sammisassani katillugit arfiniliusuni oqallisigineqartuni ilaassaaq silap pissusaata allanngoriartornerata Issittumut kingunerisai sammisassanut.
Gassinik silaannarmik kissatsitsisartunik aniatitsinermik annikillisitsiniarluni suliniutissat ippassaq saqqummiunneqarput, CO2-milli aniatitsinerup annikillisarneqarnissaa sooruna taama pingaaruteqartigisoq?
Silap pissusaata allanngoriartornera Kalaallit Nunaannut sunniuteqassasoq, Martin Stendel, Danmarkimi silasiorfimmit DMI-meersoq oqarpoq.
Silaannaq ukiuni aggersuni kissatsikkiartulissaaq, tamatumalu kingunerisaanik siallikulanerulissalluni. 1500 meteritut qatsitsigisumi taamaallaat apinerusalissaaq.
Immap sikuusarnera annikilliartulissaaq, 2050-ip aasaanerani tammavilluni aattalersimassangatinneqarluni, ukiukkullu taamaallaat sikuusalissalluni. Sermersuup aakkiartornerata kingunerisaanik imaq qaffakkiartussangatinneqaraluartoq, qaffakkiartupiloornissaa ilimagineqanngilaq.
Sermersuup ilimagisamit sukkanerusumik aakkiartornerata kingunerisaanik immap meterip affaanik meterillu arfinillit akornanni qaffannissaa aarleqqutigineqarpoq, qanorli sukkatigisumik kiatsikkiartussanersoq matumani apeqqutaassasoq, Martin Stendelip oqaatigaa.
Taamatulli aarlerisaarineq ukiut tuusintit qaangiuppata aatsaat pisinnaassasoq ilimagineqarpoq, ilisimatusartulli ima oqaatigaa:
- Immalli qaffakkiartornera aallartereerpat unitsikkuminaassaaq, Martin Stendel oqarpoq.
Silap pissusaata allanngoriartornerata Issittumut kingunerisai ”Beyond Kyoto”-mi qitiutinneqassapput. Ilisimatuut assigiinngitsut pinngortitamut, kulturimut, inooqatiginnermullu ilisimasatik aallaavigalugit oqallisissapput, qanorlu Issittumut sunniuteqassanersut ilanngullugit. Ataatsimeersuarneq aqagu aallartissaaq, Inuillu Issittormiut Siunnersuisoqatigiiffiata Kalaallit Nunaanni immikkoortortaqarfia ataatsimeersuarnermi peqataatitaqassaaq, præsident Aqqaluk Lynge aamma Lene Kielsen Holm ataatsimeersuariaqataassagamik.
