ISS Cairn Energymut sullisserusussinnaavoq
Cairn Energy suliffeqarfinnik kalaallinit pigineqartunik suleqatissarsiorpoq. S-suleqatissarsiornerminnut atatillugu kulturikkut illorsuarmi Katuami suliffeqarfinnut ippassaq paasissutissiipput. Paasissutissiisoqarnerani suliffeqarfik ISS Grønland peqataavoq. ISS Grønlandimi pisortaq, Jesper Hansen, ima oqarpoq:
-Cairn Energyp umiarsuaanni eqqiaasinnaavugut sullissisinnaallutalu. Aatsaalli pissanganarsissaaq uuliamik nioqquteqartoqalerpat. Aatsaat tamanna pisinnaappat sullissineq aallartissinnaassaaq, Jesper Hansen oqarpoq.
Cairn Energy ippassaq ullaakkut suliffeqarfinnik aggersaapput taakkununngalu qanoq pisoqassanersoq paasissutissiillutik. Cairn Energyp suut pilersaarutiginerlugit, suliat killiffiat qanorlu maannakkut ingerlanneqarnerat pillugu ippassaq paasissutissiissutigai.
- Paasissutissiinerat nuannerpoq pissanganarlunilu, qanoq suleriaaseqartarnersut aamma paasivarput, Jesper Hansen oqarpoq.
ISS Grønlandimut isumaqatigiissummik atsiorneq suliffeqarfimmut ima sunniuteqassaaq:
- Siullermik suliffissanik pilersitsissaaq, taamaasilluni suliffeqarfimmut isertitsilluarsinnaassaaq. Isumaqatigiissummik atsiorsinnaassagutta aningaasatigut isertitsilluarsinnaavugut, Jesper Hansen.
Paasissutissiinermi Cairn Energyp isumannaallisaaneq annertuumik pingaartikkaat malugineqarpoq.
Cairn Energyp isumannaallisaanikkut takutitaat ilinniarfigilluarsinnaallugu Jesper Hanseip oqaatigaa. Isumannaallisaaneq aningaasanik naleqarpoq.
- Suliassamut angisuumut peqataanissaq eqqarsaatigilluarneqaqqaartariaqarpoq, taamaattumik suliffeqarfittut sissuertumik eqqarsaatigisariaqarpoq suliamut peqataaniarnerluni, Cairn Energyp misissuineq suli aalluppaa, taamaattumik naluarput uuliamik qalluisoqassanersoq, Jesper Hansen oqarpoq.
ISS Grønlandimi inuit 300-t sinneqartut sulisorineqarput. Suliffik suliffeqarfissuarmit nunani tamalaani ingerlatsisumit pigineqarpoq. Suliffeqarfissuup inut 450.000-it nunani assigiinngitsuni 50-ini sulisorivai, soorlu Europami, Asiami, Amerikap avannaani kujataanilu aammalu Australiami.
