Israelip ministeriunera maanna utoqqatserpoq
Ilumoorpoq nunap ilaa tamanna saassukkatsigu, kingunerisassaalu alianartuupput, tamannalu utoqqatsissutigaara, taama Olmert oqarpoq, tamatumunngalu peqatigitillugu oqaatigalugu, israelimiut taamaallaat eqqaassisut pissutigalugu sakkutooqatigiit illorsuarmit tassanngaanniit eqqaanneqarmata. Ullumi ulloq aaqqiagiinngittoqalermalli Gazami amillaarnarnerpaat ilagaat. Israelimiut sakkutuui Gazap illoqarfiata qeqqanut ingerlaarput, Hamasimillu tapersersuisut akiorlugit. Tamaani napparsimmavik israelimiunit eqqorneqarpoq ikuallallunilu, Gazamilu tusagassiortut qitiusoqarfiat aamma eqqaanneqarluni.
Sakkutuut Hamasillu Gazami akiuunneranni eqqissinissaq illugu isumaqatigiinniarnerit ingerlateqqinneqarput. Aatsaannguaq Israelimiut naalakkersuisuinit oqaatigineqarpoq USA-p Hamasikkut Gazamut sakkunik eqqussinnginnissaannut ikiuunniarluni
neqerooruteqartoq. Sakkunik eqqussisarneq ilaatigut Igitsinimiit Gazamut sulluliatigut pisartoq Israelip sakkuaakkunnaarnissamut piumasaqaasa pingaarnerpaat ilagaat.
Hamasillu tusagassiorfiit arlallit oqarnerat malillugu sakkuaakkunnaarnissaq tunngaviatigut akuersaarpaa, immikkuualuttullu arlallit naammassineqarnissaat piumasaralugu, suliniaqatigiit atsiunnginneranni. FN-ip generalsekretæria Ban-Ki-Moon ullumi Israelimiippoq nunamilu siuttut ataatsimeeqatigalugit. Taassuma neriuutigalugu oqaatigaa, aaqqiissuteqarnissaq qanillisoq.
Igitsinimi oqaloqatiginnittarnikka naapertorlugit isumaqarpunga peqqarniisaarnerit unitsinniarlugu
immikkuualuttut maanna isumannaarneqalersut.
Piffissaajaqqittariaqanngilagut, maanna sakkutuujunngitsut naalliutsitaanerat unitsittariaqalerparput, FN-ip generalsekretæria oqarpoq.
Palæstinamiut tusarfii naapertorlugit Gazami innuttaasut ulluni 20-ni aaqqiagiinnginnerup ingerlanerani 1.000-it sinnerlugit toqutaasimapput. Israelimiut 13-it inuunertik annaasimavaat. Radioaviisip massuma aallartinngitsiarnerani nalunaarutigineqarpoq Hamasikkut naalagaaffimmi pissutsinut ministeriat Saeed Sayyam saassussinerni toqutaasimasoq.
