Israelip Hamas isumaqatigiissuteqarfigerusunngilaa

Tamatuma akerlianik Israelimiut sakkutuuisa Hamasimi sakkortusaarnianut sapaatip akunnerini arlalinni saassussisaqattaarnissartik naatsorsuutigaat. Aviisimi Politikenimi taama allaaserinnittoqarpoq.

Sakkulersorunnaarnissamik itigartitsineq peqatigitillugu Gazamut saassussinerit nanginneqarput, naak Palæstinamiut ulluni unnuanilu marlunni sakkulersorunnaarnissamik isumaqatigiissuteqarnissaq neriuutigileraluaraallu.

Israelimi naalagaaffimmi pissutsinut ministeri Meir Sheetrit ullaaq manna Israelip Radiuanut oqarpoq, sakkulersornerup unitsinnissaanut piffissaqartoqanngitsoq, Israelilu sakkortusaarnianut Hamasikkunnut sapaatip akunnerpassuini akiuunnissaminut piareersimasoq.

- Naalakkersuisut nunap kujasinnerusuani qunutitsinerup peersinneqarnissaa siunnerfigaat, naalagaaffimmi pissutsinut ministeri oqarpoq.

Israelimiut arfininngormalli Gazamut sakkortuumik qaartartumeerisalermatali, maannamut Palæstinamiut 345-t toqutaareerput 800-llu ikilerneqarlutik.

Gazamiit qaartartunik igeriussisaqattaarnerup kinguneranik Israelimiut sakkutuujunngitsut sisamat sakkutoorlu ataaseq toqutaapput.

Sineriak Gaza 2007-imi aasakkulli sakkortusaarnianit Hamasikkunnit aqunneqalerpoq.