Israelimut tikeraarnissaq aporfissalik
Folketingimi nunanut allanut politikkeqarnermut ataatsimiititaliami ilaasortat aalassassimaarput Israelimut tikeraarnissaminnut atatillugu Gazamut assersorneqarsimasumut iseqqusaannginnamik, pitsaanerulinngilarlu Naalagaaffiit Peqatigiit pisortaata EU-llu nunanut allanut pisortaata nuna Israelip oqartussaaffia aqqutigalugu Gazamut tikeraarnissaannut Israelip akuereqqammermagit.
Folketingimi nunanut allanut politikkeqarnermut ataatsimiititaliaq sap. akunnerani uani Kangiani Qiterlermi angalaarpoq, erseqqinnerusumik oqaatigalugu Libanonimut, Syriamut, Vestbreddenimut Israelimullu.
Aallarnissaq sioqquterujussuarluguli ataatsimiititaliap nunanut allanut ministereqarfik ikiorsiullugu Israelimi oqartussaasut Israelimiit Gazamut ingerlanissamut akuerineqaqqulluni qinnuigigaluarpai, mannali tikillugu kinguneqanngitsumik. Gazami nunaminertaq 2008-mi decembarimi 2009-milu januaarimi saassusseriataarnerup kingornali Israelimit assersorneqalerpoq.
- Palæstinamiunut qimaasunut Gazamilu innuttaasunut imaannanngeqisumik eqqugaasimasunut tunngatillugu Danmark aningaasaliinerpaat ilagaat, soorunalimi akuersaarneqarsinnaanani qallunaat inatsisartuinut ilaasortat Gazamut isersinnaanngippata suliassatullu pilersaarutivut takuniarlugit, ataatsimiititaliami siulittaasup tullia Mogens Lykketoft taama oqarpoq ataatsimiititaliap Libanonimiinnerani mobilikkut atassuteqaat pitsaavallaanngikkaluartoq.
FN-ip generalsekretæriata Ban Ki-Moonip EU-llu nunanut allanut pisortaata Catherine Ashtonip Israel aqqusaarlugu Gazamukarnissaat Israelip akuersissutigeqqammerpai. Israelip nunanut allanut ministereqarfia nalunaarummini allappoq, issuaaneq: "Gazamut isernissaannut ikiussallugit aalajangersimallutik, taamaalillutik tamaani inunnik ikiuiniarnerit
siulliullutik takuniassammatigik", issuaaneq naavoq.
Taamatut aalajangerneq qallunaat politikeriisa Israelimut tikikkunik iluaqutiniarniaraat, Mogens Lykketoft oqarpoq.
Gazamut tikeraarnissaq qallunaat politikeriinut sooq taama pingaartinneqartiginersoq aperineqarami taassuma ilanngullugu oqaatigaa, nunap ilarujussua ukiup ataatsip qaangiunnerata missaani sorsunnermit aserugaasimavoq sulilu iluarsarlugu iluamik aallartinneqarsimanani, soorunami paaserusupparput qallunaat naalakkersuisui allatut qanoq iliuuseqarsinnaanersut, Lykketoft DR-imi tusagassiortumit apersorneqarluni taama naggasiivoq.
