Israelimut akerliussutsimik takutitsisorpassuit
Belgiami illoqarfimmi Bruxellesimi inuit 30.000-it akerliussutsimik takutitsimmata, inatsisartuni ilaasortaq annikitsumik ajoquserpoq, taassuma saniatigut biilit niuertarfiit pisortallu illuutaat ajoquserneqarlutik, nutaarsiassaqartitsivik Ritzau nalunaarpoq.
Spaniami illoqarfiit pingaarnersaanni Madridimi ilinniarnertuut tuusintit sinnerlugit amerlassuseqartut, sulisartut peqatigiiffiini ilaasortat naalakkersuinermillu suliaqartut Madridip qeqqata missaani ingerlaaqatigiipput.
Østrigimi illoqarfimmi Bregenzimi inuit 4.000-inik amerlassuseqartut, Tyrkiamiut, Palæstinamiut araberillu erfalasui nassarlugit ingerlaaqatigiipput, nilliallutik “Gaza ingerlaannarli, Gaza inuummersorli”.
Tysklandimi illoqarfinni Berlinimi, Frankfurtimi Münchenimilu inuit 2.000-it missaanniittut akerliussutsimik takutitsipput.
Frankrigip kujasinnerusortaani illoqarfimmi Marseilleimi inuit 4.000-it akerliussutsimik takutitsipput, taakkuali Israel illersorlugu akerliussutsimik takutitsipput, taakkua oqarput, Israel imminut illersornissaminut pisussaaffeqartoq.
Kangiani aamma akerliussutsimik takutitsipput. Hong Kongimi inuit tuusintit sinneqartut akerliussutsimik takutitsipput taamatullu Indonesiami illoqarfimmi Jakartami musliimit 20.000-inik amerlassuseqartut Palæstinamiut illersorlugit eqqissillutik aqqusinermi ingerlaarput. Gazami Israelimilu juullip nalaanili qaartartumeerisaqattaarnerit aallartittut maannamut inuit 905-t inuunerannik akeqarput.
