Israelimiut sakkutuutik Gazami amerlivaat
Israelimiut sakkutuutik Gazap killeqarfianiittut amerlivaat. Sakkutuup israelimiup aallarunneqarnerata kingorna akersuunnerni ikinnerpaamik palæstinamiut 20-t israelimiorlu ataaseq toqutaapput.
Israelimiut sakkulersorlutik palæstinamiunik saassussisaqattaarneri Naalagaaffiit Peqatigiit inuit pisinnaatitaaffii pillugit ataatsimiititaliaani ilaasortanit unitseqquneqarput.
Israelimiut kajumissaarut tusaanngitsuusaarniarpaat, oqarlutik aalajangersagaliornermi arabiamiut taasineri sakkugineqarsimasut, USA-p EU-llu qanoq taasinissaat apeqqutaatinngivillugu.
Israelimiut amerlanerusunik sakkutuuliisimanerat pillugu Hanne Voighel DR-ip tusagassiortuanit Jannie Strüwingimit apersorneqarluni ima oqaluttuarpoq:
…
- Arabiamiut unititseqqusinnginnissaat Israelimiunit maanna anguniarneqarpoq tamanna Israelimiunut pingaaruteqartorujussuuvoq, Jannie Strüwing oqaluttuarpoq.
Israelimiut Gazamik tiguaaqqinniaratik nalunaaruteqareerput saassussinermillu kingorna qanoq iliuuseqaqqinissartik nalornissutigerpasillugu.
- Maani eqqisseqatigiinnissamik suliniartunit arlallinnit paasitinneqarpunga israelimiut palæstinamiunit qaartartumeerneqartuaramik akiniaasarnitik unitsinneq ajornakusoortikkaat, Jannie Strüwing oqarpoq nangillunilu:
- Gazap killeqarfianiilluni tamanna malunnarpoq. Taamaaginnassappat illuatungeriit sakkutuujunngitsunik annaasaqartalissapput. Maani Tel Avivimi innuttaasut amerlanerit taamatut saassusisaqattaarnerit tapersersorpaat, ajornerusumilli pisoqassagaluarpat naalakkersuisut sakkutuullu ajorineqartorujussuussasut ilimagaara, Jannie Strüwing oqarpoq.
Sakkutuup aallarussaasup iperagaanissaa arlaannaanilluunniit ilimagineeruppoq.
- Egyptenimiut isumaqatigiisitsiniartoralugit aallarussisut ippassaani isumaqatigiinniarnermit aniinnarput. Tyrkiamiut misiliigaluarput tunuarlutilli. Aallarussisut sorusunngimmata suna tamarmi unittooqqarpasippoq, Jannie Struwing oqarpoq.