Israelimiut sakkutuuisa Gazamiut mattussuuppaat
Israelimiut sakkutuuisa ikiuiniarfinneersulluunniit Gazamut isertinnaaveeqqavaat, Røde Korsimeersullu ilaannaat kisiisa isertillattaallugit.
Ullumili Gazamut isersinnaasimavoq, Danmarkip Radioanut ilanngutassiortoq, Sten Nørgaard. Taanna oqaluttuarpoq illoqarfik Gaza qanilliartorlugu inissiat Israelimiut igeriuttakkanik timmisartuniillu qaartartumeereqattaarnerannit sequminneqarsimasut sumi tamaani takusinnaallugit.
Illoqarfiulli immikkoortortaasa ilaat, qimaasut katersuuffigisimasaat aamma sequmilluinnarneqarsimaneragaasoq suli takusimanagu oqarpoq.
Israelimit Gazamut killeqarfimmi Israelimiut sakkutuui amerlaqisut iseqqusinatik paarsipput. Ikiuiniaqatigiiffineersut tusagassiortullu ikittuinnaat isertinneqarput, ullullu ingerlanerani tusagassiortut arfineq pingasut nunanit assigiinngitsuneersut iserumaartut oqaatigineqarpoq.
Gazalli kujasinnerusortaani Igitsinip tungaanut killeqarfimmi tusagassiortut 800 iserniarsarisut isertineqarallarnavianngitsut tusarsimallugu, Sten Nørgaard oqarpoq.
