Israelimiut sakkortusaaleraluttuinnarput
Tamatumunnga peqatigitillugu Israelimiut sakkutuui Gazami illoqarfimmut Rafah-mut allagaaqqanik nakkaatitsipput, tamaani najugaqartut qimagunnissaannik kajumissaarlugit, tassa Israelimiut timmisartui sorsuutit tamaani sullorsuarnut Igitsinimut aqqutaasunut qaartartunik nakkaatitsiniarmata.
Allagaaqqani oqaatigineqarpoq, tamaani najugallit, Igitsinimut killeqarfiup eqqaaniittut, angerlarsimaffitik unnugu nalunaaqutaq arfineq-pingasunngortinnagu qimassagaat.
Palæstinamiut isiginnittut oqaatigaat, Israelimiut nalunaaquttap akunnerini pingasuni saassussisarnitik uninngateriarlugit ualimut Hamasip inissisimaffiinnut saassusisarnitik nangeqqikkaat.
Israelimiut ullumi nalunaarutigaat, saassussisarnitik ullormut nalunaaquttap akunnerini pingasuni unitsittarniarlugit. Taamatut nalunaaruteqarneq Hamasimit oqaaseqartitap quianaannartutut taavaa.
- Inuit nerisassanik atortussanillu allanik aallernissaannut piffissaliunneqartoq tamanna naammanngilaq, oqaaseqartitaq tv-qarfimmut al-Jazzeeramut oqarpoq, ilanngullugulu oqaatigalugu Israelip nunanit allanit isiginerlunneqarnini kusassarniaannarlugu taama aalajangiinerarlugu.
