Israelimiut saassussipput

Israel-imiut silaannakkut ullumi saassussineranni Libanon-imiut 43-rut toqutaapput. Israel-imiut raketti-at minibussi eqqormagu aqqaneq marluk toqupput.

Libanon-imiut inuinnaat katillugit 192-it, sakkutuullu aqqaneq marluk, Israel-imiut ulluni arfinilinni saassussereernerata kingorna toqoreerput.

Hizbollah-p sorsuttartui rakettinik igeriussisarputtaaq – Israel-ip avannaani ullumi 50-it sinnerlugit toqutaapput. Rakettit ilaat inissiaq illoqarfimmi Haifa-mi eqqormagu arfinillit ikiligaapput. Tusarfik Israel-imiut naalakkersusuinut attuumassuteqarluartoq oqarpoq, Hizbollah-p killeqarfik qimappagu – sakkutuullu Israel-imiut marluk iperarunikkit Israel-imiut sakkuaakkunnaarnissamut isumaqataasinnaasut.

Israel-illi ilimagissanngilaa taama pisoqarnissaa, DR-ip aallartitaa Beirut-imit taama oqarpoq.

Akersuunneq aallartimmalli Hizbollah-p naalagaa nalunaarpoq, sakkutuut aallarussatik Israelimiut Hizbollah-p piumasaa akuerippagu aatsaat iperarneqaassasut. Hizbollah-llu piumasani suli allanngortinngilaa.

Libanon-imiut politikeriisa Hizbollah-p iliuuserisai ajorissallugit ajornakusoortippaat, Hizbollah Israelimit saassunneqarmat. Politikererli ataaseq ullumi oqarpoq, Hizbollah-p iliuuserisai Iran-imit aqunneqartut. Amerlasuut isumaqataagaluarput oqaatigerusunnaguli.

Danskit Upalungaarsimanissamut pisortaqarfiat Cypernimut ullumi sulisunik arfineq pingasunik aallartitsivoq, Danskit Libanonimit Cypernimut umiarsuarmik qimarngunneqartut ikioriartorlugit.

Sapaatip akunnerata naanerani Upalungaarsimanermik pisortaqarfik aamma Syriap illoqarfiisa pingaanersaanut Damaskusimut sulisuminik, ilaatigut nakorsat peqqissaasut ikiuisussanillu allanik ilaqartunik, danskinik qimaasunik ikiuisussanik aallartitsinikuuvoq.

Danskit Nunanut allanut ministereqarfiata danskit Libanonimit angerlartut ikiorneqarnissaat Upalungaasimanermut Pisortaqarfimmut piumasarivaa.