Israelimiut saassusseqattaarnertik ullaaq nangippaat
Israelimiut sakkutuuisa sineriammut Gazamut ullut arfineq aappassaanni saassusseqattaarnertik ullaaq manna nangippaat, taamaalillutik Palæstinamiut qaartartunik igeriuttakkanik Israelimut igeriussisarnerat unitsinniaraluarlugu.
Allattoq Louise M. Kleemann
januaarip 02-at 2009 08:19
Gazami ilisimannittut oqaatigaat ullaaq saassussisoqarneratigut toqutaasoqanngitsoq, arlallilli ikiligaasut.
Israelimiut arfininngormalli saassussisaqattaarnerisigut Palæstinamiut 420-t toqutaareerput, 2100-llu sinneqartut ikiligaallutik.
Israelimiut oqaatigaat, saassussisaqattaarnerit aallartimmatali, qaartartut igeriuttakkat 280-it Gazamit Israelimut igeriunneqarsimasut. Israelimiut sisamat toqunneqarsimasut oqaatigineqarpoq.
Israelip ministeriunerata Ehud Olmertip oqaatigaa, Israelip muslimit ingasattajaarniat Hamasikkut sakkortuumik saassutariinnarniarai, ippassarlu Hamasimi siuttut ilaat Israelimiunit toqunneqarpoq.
