Israelimiut Hisbollah-kkullu akersuunnerat sakkortuseqqippoq
Israelimiut hizbollah-kkullu akersuunnerat ullumi sakkortuseqqippoq massakkorpiarlu Naalagaaffiit Peqatigiit isumannaallisaaniaqatigiivini ilaasortat qullersartik Kofi Annan ataatsimeeqatigaat. Kangiani Qiterlermi akersuunnerit unitsinniarlugit Naalagaaffiit Peqatigiit tungaanniit killilersuutaasinnaasut ataatsimiinnerminni isumaqatigiissutiginiarsaraat.
Amerikamiut piumasaqaataat suusanersut erseqqissigaluttuinnartut DR-ip tusagassiortua Thomas Falbe oqarpoq.
- Sukkanerusumik sakkuaakkunnaartoqartariaqarpoq, tuluit ministeriunerat amerikap sineriaani angalalluni ippassaq taama oqarpoq.
Amerikami præsidenti isumaqarpoq sakkuaakkunnaarnerup suut tamaasa aaqqikkunnanngikkai.
- Uninniaannavilluni sakkuaakkunnaarnissaq ajorinngilluinnarpara. Akersuunnerulli aallaavippiaa tikinneqarunnanngilaq sakkuaakkunnaartoqarpat, præsident Bush TV-eqarfimmut FOX NEWS-imut ippassaq taama oqarpoq.
Kangiani Qiterlermi akersuunnerit unitsinniarlugit Naalagaaffiit Peqatigiit tungaanniit killilersuutaasinnaasut isumannaallisaaniaqatigiinni ilaasortat ilungersorlutik anguniaraat ullumi præsident Buship nalunaarutigaa.
Isumaqatigiinniarnerit aallartitsinnagit sakkuaakkunnaartoqassasoq nunat allamiut USA-mik illersuisut piumasaraat. Sakkuaakkunnaatoqarneraniit nunat tamat sakkutuuliinissaat hizbollah-kkullu sakkuujarneqarnissaat aamma piumasarineqarpoq.
USA-lli piumasaqaataasut maanna isumaqatigiinniarnermi ilanngunneqarsinnaanerarpai.
EU-mi nunanut allanut ministerit ullumi ataatsimiipput. Libanonimi erngerluni sakkuaattoqarunnaarnissaanik ualimut kajumissaarinissaat ilimagineqarpoq.
Nunat 25-t aallartitai isumaqatigiillutik sakkuaakkunnaarnissamik piumasaqarput, nunalli ilaanni ministerit oqaaseqartarnerisa paasinarsisippaat isumaqatigiittoqarpiarsimanngitsoq.