Israel Iranimut saassussissagunanngilaq
Iran atomimik qaartartorsualiorsinnaanngilaq. Siusinnerpaamillu 2015-imi, tassa aatsaat ukiut sisamat qaangiuppata, atomimik qaartartorsuaateqalersinnaassalluni, Israelip isertortumik paasiniaasartuini Mossad-imi pisortaasimasoq, Meir Dagan taama naliliivoq.
Ministeriuneq Benjamin Netanyahu oqalugiaraangami Iranimut siooraneq, atomimik qaartartorsuaateqarsinnaasumut siooraneq, eqqaajuaannangajappaa. Sorsutilertariaannaanerlu eqqartortuarlugu.
Ukiuni arfineq pingasuni Mossadimik aqutsisuusimasoq, Iranimillu siooranartumut isertortumik paasiniaasartut suliassaanni pingaarnerulersitsisimasoq, maanna oqarpoq Iranimiut atomimik qaartartorsualiorniarnerat ukiunik arlalinnik kinguartoorsimasoq.
Ukiaq manna Israelimi USAmilu sakkutuut qullersaat politikerillu assigiinngitsut Irani atomimik qaartartorsuaq atorlugu 2011-mi ukiup affaani siullermi saassussisinnaanera eqqartorpaat, tassalu maannamiit aasaru tungaanut Irani saassussisinnaanerarlugu.
Israelilli isertortumik paasiniaasartuini pisortaasimasup tamanna ilumuunnginnerarpaa. Saassussisoqarnissaalu ilimaginngilaa.
Sorsuttoqarnissaalu ilimananngimmat attaveqaqatigiinnikkut oqaloqatigiinnikkullu suleqatigiissinnaanissaq inissaqarnerulerpoq, Kangia Qiterlermilu sorsuttoqalernissaanik siooraneq minnerulerluni.
atomfysikerit Iranimiut ilaasa toqusimaneri tammarsimanerilu, Iranimi atomimik qaartartorsualiorniarnermut kinguartitsisimasut ilagaat, paasisimasallit taama oqarput. Israelimi isertortumik paasiniaasartut Mossad toqutsisimasutut tammartitsisimasutullu pasineqartarput; Mossadimili pisortaasimasup nalunaarummini kingullermi tamakku eqqaanngilai.
