Israel Iranimut saassussiniarnerarlugu allaaserineqarpoq

Iran-ip atomiliorfianut Israeli atomit atorlugit saassussinissaminut piareersaateqarnerarlugu tuluit aviisiisa allaaserinneqattaarnerat Israelip akuersaanngilluinnarpaa.

Israelip nunanut allanut ministeeriaqarfiani oqaaseqartartuutitaq oqarpoq illarnaannarnerarlugu Israeli atomit atorlugit Iranimut saassussisoqassanerarlugu allaaserinnittoqarmat.

Taama Israeli pilersaarnerarlugu tuluit aviisiat Sunday Times allaaserinnippoq. Aviisimut tassunga Israelimiut sakkutuui aterminnik taaserusunngitsut oqaluttuarsimapput Israelimiut timmisartuutaasa qaartartut iternga tikillugu aseruisinnaasut sakkutullu akuerisaasut Israelip atornialersaarai. Taamatullu qaartitsereeriarunik atomitortuaqqat aaliangersimasumillu periaaseqartartut atorlugit Iranimiut Uranilionerminnut atatillugu atomiliorfiat sequmminniaraat sakkutuut taakku oqaluttuarsimapput. Taamatullugooq pilersaaruteqarnermi Iranip atomi atorlugu sakkuliornera ajoquserniarneqarsimasoq erseqqissaasimapput.

Pilersaarutigineqartorlu ilumoorsimassappat piviusunngussagaluarpallu tamanna ajunaarnersuarmik pilersitsissasoq isumannaallisaanermut politikkimut ilisimatooq Bertel Heurlin Danmarkip radioanut oqarsimavoq.

Taannali ilisimatooq erseqqissaavoq tamanna politikkikkut saqqitsaannermik tunngaveqarsimassangatikkini taamalu qunusaarutitut oqaasiinnaasoq.