Israel-imiut saassussimmata inuit 210 toqutaapput

Unnukkut nutaarsiassat kingulliit tusarfiit malillugit Gaza-p killeqarfiata eqqaani Israel-imiut saassunneranni inuit 210 toqutaasimapput.

Palæstiinamiut pikititsiniartartuisa rakitsit 80-it sinneqartut Israel-ip tungaanut igeriuppaat, tamatumalu kingorna Israel-imi pisortat aarlerisaaripput, rakitsinik igeriussinerit unitsinniarlugit saassuniarlutik.

Israel-imiut sakkutuuisa timmisartumik saassussinerisa kingorna Palæstiinamiut sorsuttartui rakitsinik Israel-ip tungaanut igeriussipput, saassussinermilu tassani Israel-imiut sakkutuuat ataaseq toqutaavoq allallu sisamat ikiligaallutik.

Pisariaqassappat Israel-imiut saassussinertik annertusissagaat, Israel-imi aviisi Haaretz nittartakamini taamatut allaaserisaqartoq ritzau nalunaarpoq.

Israel-ip illersornissamut ministeria Ehud Barak tusagassiortunik katersortitsinermi oqarpoq, saassussinissamut piffissanngortoq.

Nalagaaffiit Peqatigiit pisortaata Ban Ki-moon-ip unnumut oqaatigaa Israel-imiut Palæstinamiunut saassussinerat akuerisinnaanagu.

Hamas nalunaarpoq, Israel-imiut saassussinerat akillugu, imminut toquutitigaluni qaartartumeerinninnerit Israel-imi aallarteqqinniarlugit.