Israel Gazamut aatsaat taama sakkortutigisumik saassussisoq
Israelimiut sakkutuui Gazap avannarpasissuani unnuaq unnuap qeqqata missaani qaartartumeeringaatsiarput. Muslimit ingasaassiniat Hamasimeersut Gazap avannarpasissortaani aqutsisuupput.
Aviisip The Times of Israelip allaaserisaa naapertorlugu Israelimiut timmisartut malersuutit raketillu atorlugit Gazamik saassussinerat, Israelimiut Palæstiinamiullu akornanni sapaatit-akunnerata ataatsip matuma siornatigut aallartinnerani aatsaat taama sakkortutigaaq.
Hamas Israelip saassussineranut akiniaalluni Israelip kujasissuata qiterpasissuatalu tungaanut raketinik amerlasuunik igeriussivoq.
AAMMA ATUARUK FN-p Israelip Hamasillu akornanni sorsulivittoqarsinnaanera aarlerisaarutigaa
Saassussinerit aallarteqqammiinnartullu Israelip ministeriunera Benjamin Netanyahu nalunaaruteqarpoq, Hamas "peqqarniisaarniaqatigiillu allat" tassani sioorasaarlugit, iliuuseqassappatalu sakkortuumik akiniarneqarumaartut oqaatigalugu.
Israelimi illersornissaqarfik naapertorlugu Hamasip raketit 1750-t missaat Israelip tungaanut ataasinngormalli igeriussimavai, Israelilu akiniaalluni Gazamik qaartartumeerilerluni.
Gazami sumiiffiit 600-ngajaat qaartartumeersimallugit Israelip illersornissaqarfiata sisamanngornermi ilisimatitsissutigaa.
Naalagaaffiit Peqatigiit Isumannaallisaaniaqatigiivisa Israelip Palæstiiniullu akornanni aaqqiagiinngissutit eqqartorniarlugit sapaatiuppat ataatsimiissapput.
