Isornartorsiorujussuarneqarnerminut akissuteqarpoq
USA-mi inatsisartut illersornissamut ataatsimiititaliaata siulittaasuata Demokratiusup, Carl Levin-ip Irakimi inatsisartut kajumissaarpai al-Malikip naalakkersuisuutitai uppiteqqullugit, tassa upperisarsioqatigiit akerleriittuartut sunnimuslimit aamma shiamuslimit eqqisseqatigiississinnaanngimmatigik.
USA-p Bagdadimi aallartitaata ippassaq oqaatigaa eqqissineq anguniarlugu suliniarneq pakatsinarnerarlugu. Aamma præsident Buship al-Malikip naalakkersuisuutitai unnuaq nersualaarpallaanngilai.
- Irakimiut naalakkersuisuisa akornanni pakatsisimaartoqarpoq, Bush oqarpoq mianersoqqusillunilu:
- Tunngaviusumik apeqqut tassaavoq inuiaat piumasaat naapertorlugit naalakkersuisut ingerlatsinersut, taamaaliunngikkunimmi taarserneqarsinnaapput, Bush oqarpoq.
Taamatut isornartorsiuisoqareersorlu Maliki sakkortuumik akissuteqarpoq:
- Kialluunniit Irakimi naalakkersuisut piffissalerlugit naalakkersinnaanngilai. Inuinukua namminneerlutik qinigaat, Maliki oqarpoq.
USA-mi præsidentip illorsuanit isornartorsiuineq unnummut sakkukinnerulersinniarneqarpoq, oqartoqarluni isornartorsiuineq tusagassiorfinnit ingasaallugu oqaatigineqarsimasoq.
Aamma Buship Irakimik isornartorsiuineq sakkutuujusimasut peqatigiiffianni qanittukkut oqalugiarami eqqaanaveersaarluinnarpaa.