Pasineqartut aqqinik saqqummiussineq Islandimi aaqqissuisup illersoraa
Tusagassiuutilerinermili maleruagassat naapertorlugit, eqqartuunneqarsimanngitsoq avammut saqqummiunneqaqqusaanngikkaluarpoq.
Birna Brjánsdottirimik toqutsisimasutut pasineqartut aqqi avammut saqqummiunneqareerput.
Tusagassiuutilerinermi maleruagassat naapertorlugit, pasineqarlutik tigummigallarneqartut aqqi avammut saqqummiunneqaqqusaanngillat. Tamanna Islandimi aamma atuuppoq.
AAMMA ATUARUK Birnamut tunngasut
Tusagassiuutitigut allaaserineqartunut tunngatillugu sammisaq sissuigassaatillugu sapinngisaq naapertorlugu pisariaqanngitsumik misigissutsitigut innarliinissaq kanngusutsitsinissarlu pinaveersaartinneqartassaaq.
Taavalu aamma inuk kinaluunniit eqqartuunneqarsimanngitsoq saqqummiunneqassanngitsoq, maleruagassani allassimavoq.
Taamaakkaluartoq tigummigallarneqartut aqqi assingilu avammut saqqummiunneqarput.
- Politiit paasiniaatillugit misissueqqissaartillugilluunniit aqqinik nalinginnaasumik saqqummiussineq ajorpugut. Misissuinerli una nalinginnaasuunngilaq. Misissuineruvoq nuna tamakkerlugu malinnaavigineqartoq. Misigisimavugullu pineqartut kinaanerinik saqqummiussigutta pisuunngitsut iluaqutigissagaat. Islandimi nutaarsiassaqartitsiviit allat aamma saqqummiussipput, nutaarsiassaqartitsiviup Stundin.is-ip aaqqissuisua Jón Trausti Reynisson oqarpoq.
Birna Brjánsdottirimik toqutsisimasutut pasineqarlutik tigummigallarneqartut ullumi killisiorneqassanngillat. Tigummigallarneqarnerallu februaarip aappaanut killeqarpoq. Erseqqissaassutigissarvarput pineqartut suli eqqartuunneqanngimmata.
AAMMA ATUARUK Birna nunarsuarmi malinnaavigineqarluartoq