Islandip USA kamaappaa

Erla Osk Arnardottir New Yorkimi John F. Kennedyp mittarfissuani unitsinneqarpoq, paffimmigut singernermigullu kalunnilerneqariarluni ullut marluk parnaarusimaneqarpoq. Tamatumunnga pissutaavoq arnaq taanna ukiut qulit matuma siornagut kinaassutsimut allagartamut naqissusigaalluni atortussanngortitaasumut malittarisassat unioqqutillugit sivisuallaamik USA-miissimanera.

Arnaq taanna Islandimiu 33-nik ukiulik USA-liarpoq niuerniariarniarluni ikinngutinilu naapinniarlugit, tamatumunngali taarsiullugu nammineq oqarneratut inuulillaramili aatsaat taamak nikanarsagaatigaaq.

Mittarfissuarmi ulluni marlunni killisiorneqarpoq, ilaquttaminut sianersinnaatitaanani. Aamma oqaatigaa arlaleriarluni nerinissaminut imernissaminullu itigartitaasarluni.

Ilanngullugu oqaluttuaraa, paffimmigut singernermigullu kalunnilerneqarluni New Jersey-milu parnaarussivimmut nuunneqarluni tassanilu killisioqqinneqarluni ilaquttaminullu suli sianeqqusaanngittuarsinnarluni.

USA-miit marlunngormat anisitaavoq misigisanilu nittartakkakkut allaaseralugit.

Islandip nunanut allanut ministeria, Ingibjorg Solrun Gisladottir, USA-p Islandimi aallartitaqarfianut naammagittaalliuuteqarpoq Amerikamilu oqartussaasut pissusilersornerat akuerineqarsinnaanngitsutut taallugu.

- Suliassami matumatut ittumi kalunnernik atuineq naapertuilluarnerulersitsinngilaq. Naalakkersuisut kukkussuteqaraangamik utoqqatsertarnissaat isumaqarpunga pissusissamisoortuusoq, matumanilu Amerikamiut pissusilersornertik pillugu utoqqatsertariaqarput, Gisladottir oqarpoq.

USA-p Islandimi aallartitaata New Yorkimi mittarfissuarmi akisussaasut nassuiaateqaqqullugit qinnuigisimavai.