Islandimut takornarniarusukkunnaarput

Islandimut takornarniarniartut Islandiliarnissartik taamaatiinnarsimavaat. Islandimi takornarnianik angallassilluni arfernik takornarniartitsisartoq ernumalluni Islandimi aviisimut Frettabladid-imut taama oqaluttuarpoq.

Islandimiut aningaasarsiutigalugu arfanniartarniarlutik aalajangernerisa kingorna nunanit tamalaanit Islandimut takornarniarniarlutik pilersaarutiminnik taakku unitsitsisimapput.

Islandimiut aallartitaat USA-miittoq TV-qarfimmit CNN-imit ippassaq apersorneqarpoq. Apersuinermi Islandimiut aalajangernerannut tunngavigineqartoq nassuaatigaa.

Islandimi naalakkersuisut aalajangernerat isiginnaartunit isumaqatigineqarsimanngitsoq paasinarsivoq.

- Nunatsinni arfanniarneq nunani allani tusaamanerluutigilersinnaavarput, taamaammat tatiginassusitta innarlerneqarnissaa aarleqqutigaara, Islandimi avatangiisimut ministeri oqarpoq.

Piujuaannartitsinissaq tunngavigalugu Islandimi arfanniartoqartoq aamma erseqqissarpaa.