Islandimiut tunisassioriaasiannik ilikkagaqarsinnaavugut
Ane Hansen, Islandimi paasisassarsiorlutik angalareerlutik taama oqarput.
Tunisassiornermik inerisaaneq ukiorpassuarni ingerlasarpoq, tunisassiassanik ilisimatusarneq annertunerusariaqarpoq, Ane Hansen oqarpoq. Islandip imartaani aalisakkat pisarineqartut suli tulaanneqaratik nunat allamiunit pisiarineqartarput. Aalisakkat pisarineqartut Islandimut tulaanneqarlutik tisaneqartarput, tarajorterlugilluunniit, aalisagarlu tamangajaaviat tunisassiatut suliarineqartarluni. Kalaallit Nunaanni aalisakkat pisarineqartut pitsaasunngorlugit tunisassiarineqartalissappata, aalisartut, aalisakkanik tunisassiortut, niuertut politikkikkullu suliaqartut suleqatigiittariaqartut Aalisarnermut Naalakkersuisoq Ane Hansen oqarpoq. KNAPK-ip suleqatigiissuseqarusussusermik nipeqarluni qaaqqusisimanera Aalisarnermut Naalakkersuisup Ane Hansenip nuannaarutigaa, suliassanut annertuunut ammaasissussaammat.
