Islandimiut sullarissut

Danskit, islandimiusulli sulitigigaluarpata, Danmark-imi sulisinnaasut 350.000-inik amerlissagaluarput, Danmarkimilu kaaviiaartitat 13 procentimik qaffassagaluarlutik, Danmarkimi aviisi erhvervsportalen Idag.dk taama allappoq.

Isummersuisit talerpilliuniartut Ceposikkut aningaasaqarneq pillugu siunnersuisartuata Mads Lundby Hansenip, danskit islandimiullu sulinerisa sivisussusaannik misissuisimasoq ima oqarpoq:

- Sulineq sivitsorneqarpat sulisussaaleqineq qaangerneqarsinnaavoq. Sulisut piginnaasaqarluareerput. Soorunami atorfinititsisoqarsinnaavoq taamaattorli sulilerlaat ilinniartinneqareeraangamik aatsaat pitsaasumik kiffartuussilersinnaasarnerat eqqaamasariaqarparput, Mads Lundby Hansen oqarpoq.

Nunani tamalaani aningaasaqarneq ineriartortitsinerlu pillugit suliniaqatigiiffimmi ilaasortanit nunani sivikinnerpaamik sulisitsisartunut Danmarki ilaavoq; agguaqatigiisillugu ukiumut nalunaaquttap akunneri 1600-t angunngiluatsiarlugit sulisoqartarluni. Nunat allat tallimat ukiumut sivikinnerusumik sulisitsisarput.