Islandimiut sivisuumik mattussaaqqaqqusinngillat
Angut islandimiuusoq 25-inik ukiulik annertuumik ikiaroornartulerisimasutut, ukiup affanngortumi Savalimmiuni allanut attaveqarsinnaatinnagu mattussaaqqavoq.
- Taama sivisutigisumik mattussaaqqatitsisoqarsinnaanngilaq, Islandip nunanut allanut ministeria Sólrun Gisladóttir, angut mattussaaqqasoq pillugu inatsisartuni Altingimi ippassigami oqallinneqarmat oqarpoq.
Pinerlussimanernut atatillugu sivisuumik mattussaaqqasarnerup Nunani avannarlerni unitsivinneqarnissaa Islandimiut maanna angunialerpaat.
Angut 25-inik ukiulik ikiaroornartunik iisartakkanik amfetamininik ecstasy-nillu Islandimut Savalimmiunullu eqqussuisimanernut atatillugu Savalimmiuniitinneqarpoq.
Inuit arlallit Danmarkimi, Islandimi, Savalimmiuni Norgemilu tigusarineqarsimapputtaaq. Danmarkimeersut Norgemeersullu iperagaareerput, Islandimeersut Savalimmiuneersullu pineqaatissinneqarsimallutik.
Islandimi inuit tallimat pineqaatissinneqarput, qaammatit 18-iniit ukiut qulingiluat affarlu tikillugit parnaarussanngortitaallutik. Taakku arlaannaalluunniit ullut 100-t sinnerlugit allanut attaveqarsinnaajunnaarlugu mattussaaqqanngitsoq, islandimi politikerit erseqqissaatigaat.
Savalimmiuni eqqartuussivik naalagaaffeqatigiinneq pissutigalugu Danmarkimi inatsisinik atortitsinermut ministereqarfiup suli isumagisaraa.
Savalimmiuni politiit ukioq kingullermut nalunaarusiaat malillugu Savalimmiuni eqqartuussiviit sulinissaannut malittarisassat 1988-imiilli allanngungaarsimanngillat.