Naalakkersuisut siulittaasuat Kuupik Kleist ullumi Islandip nunanut allanut ministerianik, Össur Skarphédinssonimik Stockholmimi Nordisk Rådip ataatsimiinneranut atatillugu ataatsimeeqateqarpoq.
Ataatsimiinnermi Kalaallit Nunaata Islandillu peqqinnissakkut angallannikkullu suliassaqarfinni suleqatigiinnertik patajaallisassagaat aalajangiunneqarpoq.
Kalaallit Nunaanni peqqinnissamik suliaqartut novembarimi Islandimukariissapput, naatsorsuutigineqarporlu peqqinnissakkut sullissinissat pillugit nalinginnaasumik isumaqatigiissut ukiortaartinnagu atsiorneqarumaartoq, taamaalillunilu Kalaallit Nunaanni suliaritinniarlutik utaqqisut ikilisinneqarnissaannut Island peqataasinnaalissalluni.
Aammattaaq angallannikkut suleqatigiinnerup ineriartorteqqinnissaa pillugu isumaqatigiittoqarpoq.
Kuupik Kleistip Islandillu nunanut allanut ministeriata Kalaallit Nunaanni angallanneq pillugu kommissionimit angallannermut tunngasutigut periarfissat misissuataarneqarnissaat qilanaaraat, nunat taakkua marluk akornanni suleqatigiinnerup qaninnerulerneranik kinguneqartussaq.
Kuupik Kleist Össur Skarphédinssonilu 2010-mi ataatsimeeqqissallutik isumaqatigiipput, tamatumani peqqinnissakkut angallannikkullu taamanikkussamut nunat taakkua akornanni angusarineqartussat inerneri naliliivigiumaarlugit.