Islandimiut Nunatsinni dommeriulerunarput
Assammik arsarnermi dommerit peqatigiiffiata Siggartap dommerit akissarsiaasa nutarternissaat pillugu siunnersuut februaarimi nassiuppaat. Pissartanngorniunnissalli aporluinnartut aatsaat GHF akivoq dommerit piumasaat akuerisinnaanagu.
- Erseqissarusuppara Ilulissani BankNordik GM pilersaarutit malillugit ingerlanneqassammat aammalu dommerit piukkunnarluartut dommeriussasut, GHFip siulittaasuata tullia John Jakobsen KNR-imut taama oqarpoq.
Taassuma KNR-imut uppernarsarpaa Siggatamut ilaasortaanngitsunik dommerissarsiorneq ingerlanneqartoq. Dommerilli peqatigiiffiata piumasani aalajangiusimavai.
Illuatungeriit dommerit akissarsiassaat pillugit kisitsisinik saqqummiussaqarumanngillat. Kalaallit dommerit ullup unnuallu tulliuttup iluani aalajangertariaqarput tassami aqagu ualikkumut Ilulissanut billetissaqarput.
- Ilaasortatsinniit pisussaaffilerneqarsimavugut isumaqatigiinniarnermi anguniakkat aalajangersimasut aalajangiusimassagivut tamannalu malinniarparput. Kisianni erseqqissarusuppara isumaqatigiinniarnerit ingerlaqqinnissaannut piareersimajuarata ammallutalu, Siggartami siulittaasoq Steffen Silassen KNR-imut oqarpoq.
GHFip maanna siunniutilerpaa Ilulissani BankNordik GM-ip aallartinnissaa sioqqullugu isumaqatigiissusiortoqarsinnaanavianngitsoq.
- Uppernarsarsinnaavara dommerit Islandimeersut aamma Danmarkimeersut attavigineqareersut. GM pilersaarutit malillugit ingerlanneqassaaq, John Jakobsen GHF-imeersoq oqarpoq.