Islandimiut kisimik annaassiniarsinnaalerput
Islandimi amerikamiut sakkutooqarfikuanit amerikamiut timmisartuat kingulleq qangattarmat silaannakkut annaassiniartarnissat islandimiut kisimik akisussaaffigilerpaat.
Islandimiut timmisartui upalungaarsimasuutitat, Dauphin aamma Super Puma, maanna kisiartaallutik Islandimi eqqaanilu silaannakkut annaassiniarnermi atorneqarsinnaalerput.
Amerikamiut sakkutuuisa timmisartui NATO-p Keflavikimi sakkutooqarfianiittut sapaatip-akunnera kingulleq ilanngullugu ikiuussinnaasimagaluarput. Amerikamiut Islandimi sakkutooqarfimminnik matusinerisa kingunerisaanik timmisartoq angallannermi atorneqartartoq sapaatip-akunnerani kingullermi Tuluit Nunaannukarluni aallarpoq.
Amerikamiut sakkutuui 20-t missaanniittut timmisartumut kingulliulluni qangattartumut ilaasimasut, Islandimi radioqarfik RUV nalunaarpoq.
Amerikamiut timmisartui Tuluit Nunaannit aqunneqarlutik 1971-imi Islandimi annaassiniartarnertik aallartippaat. Taamanimiilli 300-t sinnerlugit annaanneqarput puigunaatsumillu annaassiniartoqartarpoq. Islandimiut upalungaarsimasuutitaasa, Landhelgisgæslan-imik taaguutillit, maanna Islandip silaannartaani silaannakkut annaassiniarnerit tamaasa akisussaaffigilerpaat. Islandimiut timmisartunik marlunnik pisiniarniarlutik eqqarsarput.
