Taamaammat naalakkersuisut aalajangerput, nuna ajutoornermit eqqugaaqqaqisoq ilaasortanngornissaminut qinnuteqaateqassanersoq qinnuteqaateqassannginnersorluunniit Islandimi Altinngip aalajangissagaa. Islandimi ministeriuneq, Johanna Sigurdadóttir, erseqqissumik ippassaq unnukkut taama oqarpoq.
Islandimi aningaasaqarnikkut ajutoorneq qaangerneqassappat EU-mut ilaasortanngornissaq pitsaanerpaassasoq, Johanna Sigurdadóttir siusinnerusukkut oqartaraluarpoq. EU-mut ilaasortanngornissaq Socialdemokratit tapersersorpaat, naalakkersuisoqataasullu De Venstregrønnit EU-mut ilaasortanngornissamut nangaapput.
EU-mut ilaasortanngornissamut isumaqatigiinniarnissamut Islandimi Inatsisartut, Altingit, naalakkersuisut piginnaatissavaat, Sigurdadóttirilli tamatuma qanoq inerneqarnissaa qularutiginngilaa.
Ilaasortanngornissamulli aalajangernissaq innuttaasunit aalajangiiffigineqassasoq naalakkersuisut aalajangerpaat.
- Island EU-mut ilaasortanngussanersoq innuttaasunik taasisitsinikkut aalajangerneqarumaarpoq, naalakkersuisut oqarput.
EU-mut ilaasortanngornissaq islandimiunit amerliartortunit tapersersorneqarneruleraluartoq, isumasiuinerit takutippaat taasisitsisoqassappat innuttaasut affangajaat ilaasortanngornissamut angissamaartut, nutaarsiassaqartitsivimmit Reutersimit tamanna ilisimatitsissutigineqarpoq.