Islandimiut aningaasaliisartut ikiliartupiloorput
Islandimiut aningaasaliisartorpassuit patanartorujussuartut paasisimasaqarluartut arlallit nalilerpaat, tassami timmisartut, pisiniarfiit pigisallu nalillit aningaasaliiffigineqartartut piffissami matumani qajannaqimmata. Aviisimi Danmarkimi ullormut saqqummersartumi, Børsen-imi, tamanna atuarneqarsinnaavoq.
Danmarkimi aviisi akeqanngitsumik agguaanneqartartoq, Nyhedsavisen, ippassaq matuneqarpoq, taanna islandimiumit aningaasaliisartunit, Baugur-ikkunnit, aallartinneqarpoq, aallartinneqarmallu Danmarkimi aviisit akeqanngitsorpassuit aallartinneqarput.
Islandimiut aningaasaliisartut ingerlanerliornerat Islandimi aningaaseriviit ajutoornerannik kinguneqarnissaa aningaasaliisartunit arlalinnit ernummatigineqarpoq.
Taamaammat Islandimi aningaasarsiorneq Tuluit Nunaanni aningaasarsiornermut suliffeqarfissuup, Fitch Ratings-ip, nalilersoqqammerpaa, Islandimilu aningaaseriviit navianartorsiortorujussuartut isigai.
