Islandimiut akerliussutsimik takutitsipput
Ilaatigut Islandimi politiit arfininngormat akerliussutsimik takutitsisunut hunnorujulikkaanut, Reykjavikimi politiit qullersaqarfiannut isaasunik qasilitsunik seqqitsaasimapput. Tassani igalaat arlalissuit aserorterneqarput.
Akerliussutsimik takutitsisut ministeriunerup Geir Haardep aamma centralbankip pisortaata David Oddsonip tunuarnissaat piumasaraat.
Hordur Torfason, tassaasoq nipilersortartoq tusaamasaq, akerliussutsimik takutitsinermut aaqqissuisunut ilaasoq oqarpoq, naalakkersuisut tunuarnissaasa tungaanut akerliussutsimik takutitsinerit ingerlatiinnarneqassasut.
Aningaasarsiornikkut ajornartorsiornerup kinguneranik Islandimi aningaaseriviit annerit pingasut ajalusoorput, naalagaaffimmillu ingerlanneqalerlutik. Islandip koruuniata nalinga apparujussuarpoq, nunanullu allanut akiitsut amerlasoorujussuullutik. Tamatumunnga patsisaavoq Islandimi sanaartornermik ingerlataqartut aningaasarpassuarnik atorniartarsimammata, Europami USA-milu suliffeqarfissuarnut annertuunik pisiniarsinnaajumallutik. Taamatut periuseqarneq nunarsuarmi aningaasarsiornikkut ajutoornerup kinguneranik ajalusoorpoq.