Islandimiut ajugaaqqipput

Nunatsinni pissartat GSS-imeersut aamma FH Hafnarfjordurip unamminerat takorannerluinnarpoq. FH tassani 26-22-mik ajugaavoq muminnermi 13-9-mik siuaqqareerluni.

Islandimiut teknikkikkut kukkuneri akuttupput GSS-ermiut kukkullattaanerusut.

- Teknikkikkut kukkunerit ikinnerusimasuuppata naligiinnerusimasinnaagaluarput, aaqqissuisuniit Boas Møller oqarpoq.

Islandimiut maanna unamminerni aallarniutaasuni ajugaasussanngorput marloriarlutik unamnmereerlutik marloriarlutik ajugaangamik. Unnugu unammissavaat NÛK unamminerni marlunni marloriarlutik ajorsartut.

NÛK Byhold-ilu naligeeqalutik ippassaq unammipput Byholdinilu arsartuupput Iluliarmiut, Sisimiormiut, Nuummiut Danmarkimilu najugallit. Muminnermi Byholdit 13-12-mik siuaqqalaarput. Unamminerullu sinnerani naligeeqaat. Unammineq naammassimmat Byholdet 26-25-mik ajugaavoq. NÛKp Karen Marie Kyed Meyer amigaatigeqaa taanna ataasiarluni unammeqataareerluni suliffimminut atatillugu angalagami unammersuarnerup sinnera peqataassanngimmat. Karen Marie Kyed Meyer unammersuartuni kisiartaalluni Faxe Cup 1991-mi aallarteqqaarmat unammeqataavoq. Maannalu ukiut 20-it ingerlareersut suli arsartutut pingaaruteqarluinnartutut inissisimavoq.

FH aamma NÛK unnugu imminnut unammissapput. Islandimiullu ajugaassappata taakku imminut ullut marluk tulleriisilugit unammisussanngussapput. Semifinalet aqagu arfininngornermi ualikkut pingasuniit ingerlanneqassapput unamminerit aallarniutaasut naammassineranni normu 1 aamma 4 unammeqqaassallutik semifinalellu aappaani normu 2 aamma 3 unammissapput.

Aajuku sisamanngornermi angusat:
NÛK - Byholdet 26-25 (13-12)
GSS - FH Hafnarfjordur 22-26 (9-13)

Aajuku tallimanngornermi unamminissat:
Nal. 19.00 Byhold - GSS
Nal. 20.40 FH Hafnarfjordur - NÛK