Islandimiu pissarsuaq tikippoq

Arnat assammik arsarlutik unamminnerat Faxe Cup unnugu aallartissaaq tassanilu Islandimiut FH Hafnarfjordurimeersut ajugaassangatinneqarput. Unnugu unamminissat tulleriinnerat takuuk.
Allattoq Noah Mølgaard
oktobarip 19-at 2011 13:02

Faxe Cup ammaanersiorlugu unnugu nalunaaqutaq 19.00 unammissapput GSS aamma NÛK timersortarfissuarmi Inussivimmi. Unamminermi tullermi unammissapput byholdet nunanut allanut unammisartunik ilaqartut kiisalu Islandimiut FH.

FH Hafnarfjordurimeersut unammersuarnermi ajugaassangatinneqarput. Islandimiut taakku Islandimi pikkorinnerit unammineranni upernaaq normu 7-nngorput iligiinnilu arsartut arlallit inuusuttut nunanut allanut unammisartuiniipput.

- Arsartugut pikkorinnerit nassarpagut taamaallaat saamik pikkorinersarput ilaanngilaq, FHp sungiusaasuat Jón Gunnlaugur Viggósson KNR-imut oqarpoq.

FH Nuummut ullumi pingasunngornermi tikipput taamalu Faxe Cup ukiunik 20-nngortorsiortoq peqataaffigissallugu piareerlutik. GSS aamma NÛK Faxe Cup-imi amerlanerpaanik ajugaanikuupput, Danmarkimiilli peqataasoqaraangat tikeraat ajugaasarsimapput ukiut ingerlanneranni tassaasut Helsingør IF, Vidar Sønderborg aamma Lyngby HK.

Maanna tassa Faxe Cup-imi siullerpaamik islandimiunik peqataasoqarpoq, atlantikullu avannaani sanilitta unammersuarneq atorniarpaat iligiittut imminnut sungiunniarfittut Islandimi unammersuarnerit piareersarfigalugit.

- Faxe Cup-imi peqataanerput atorniarpara iligiittut suleqatigiinnerup pitsanngorsarnissaanut. Uagut pitsaaqutigaarput arsarfimmi sumi inissisimaffik apeqqutaatinnagu isertitseriallaqqissortaqaratta. Aamma assersuineq nukittuffigaarput amerlanertigut 6-0-mik taaneqartartumik assersuisarluta, Jón Gunnlaugur Viggósson oqarpoq.

- Maanna kalaallit unammisassagut naluakka qanoq kakkatsiginersut, kisianni tassa ajugaanissaq siunertaralugu peqataavugut. Kisianni naatsorsuutigisariaqassaaq unamminerit ingerlaneranni taarseraangaatsiartarnissarput tassami aalajangersimagatta Faxe Cup-imi peqataasut 17-it tamarmik arsarnissamut periarfissinneqassasut, Jón Gunnlaugur Viggósson oqarpoq.

FH-mi arsartut inuusuttuni nunanut allanut unammisartuniipput arsartullu arlallit 17-iinnarnik ukioqarput. Inussivimmi isiginnaartussat taamaattumik naatsorsuutigissavaat tassanngaannaq sukkasuumik saassusseriasaartoqartarnissaa.

Aajuku unnugu unamminissat:
Nal. 19.00 GSS - NÛK
Nal. 20.40 Byhold- FH

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk