Islandimi qinersineq: Arnat inatsisartuni amerlanerussuteqalertut
Arnat Islandip inatsisartuini amerlanerussuteqartussanngortut, Europamilu nunat inatsisartuini arnat siullerpaamik amerlanerussuteqartussanngortut, Islandimi Inatsisartunut ippassaq arfininngornermi qinersinermit inaarutaasumik kisitsisit ullumi sapaammi takutippaat.
Islandip inatsisartuini Atingetimi ilaasortani 63-ini arnat 33-nngortussanngorput.
AAMMA ATUARUK Islandimi sapaatit-akunneranut ulluni sisamani sulisarnissamik misileraaneq iluatsilluartoq
Naalakkersuisoqatigiit amerlanerussuteqaqqissasut
Nunat tamalaat aningaaserivissuata paasissutissaatai naapertorlugit, arnat Europami nunat inatsisartuisa ilaasortaanni 50 procentinit aatsaat amerlanerusussanngorput.
Island World Economic Forumip nunat naligiissitaaffiunerannut allattorsimaffiani naligiissitaaffiunersaattut ukiuni kingullerni aqqaneq-marlunni allassimavoq.
Islandip naalakkersuisoqatigiivi Altingimut arfininngormat qinersinerup kingorna amerlanerussuteqaqqissapput. Taaguussinerit kisinneqarneri ullumi sapaammi ulloqeqqata missaani naammassimmata, tamanna paasinarsivoq.
Partiilli assigiinngitsut pissaaneqarnerat allanngussammat, maanna ministeriunerusoq, Katrín Jakobsdóttir, naalakkersuisoqatigiinni siuttuuginnarsinnaanersoq nalunarpoq. Naalakkersuisoqatigiillu ingerlaqqissanersut aamma nalunarpoq.
