Islandimi præsidenti qinigaaqqittoq

Islandimi ippassaq præsidentinngorniuttoqarnerani præsidenti toqqagaaqqippoq.

Islandimi præsidentinngorniuttoqarnerani præsidenti Gudni Johannesson qinigaaqqippoq, taanna unammillertinilu Gudmundur Franklinilu marluinnaallutik sassaramik qinerneqarnerungaatsiarpoq.

Qinersinermi taasissutit ullumi sapaammi sinneruttut kisinneqarput, taamaalillunilu Gudni Johannessons 92,2 procentinik qinersiseqarluni præsidentitut ingerlaqqippoq.

Nutaarsiassaqartitsivik dpa taama allaaserisaqarpoq.

Islandimi innuttaasut 252.000 missaanniittut qinersisinnaatitaapput, taakkunannga 67 procentii qinersiartorsimapput.

Gudni Johannesson ukiuni sisamani tulliuttuni maniguulluni suliniarluni tv-kkut apersorneqarluni oqarpoq.

Taassumalu apersorneqarnermini malitassatut nuannaartorisani kinaanersoq oqaatigaa.

Islandip præsidentiat Liverpoolinut tapersersuinngikkaluarluni, tyskit arsaattartuisa sungiusaasuannut, Jürgen Kloppimut, nuannaartorinninnini oqaatigaa, sungiusagaammi Premier League pissartanngorniunnissaannut qulakkeeqqapput.

- Sungiusaasut akisussaaffeqarnini takutippaa, maniguullunilu. Inuk unamimillerumatuujuvoq, pissuserillunilu. Aalariartitassaanngitsoq, kisianni maniguuttoq, Gudni Johannesson oqarpoq.

- Tassa aqutsilluarneq, uangattaaq præsidentitut taamatut ukiuni sisamani tulliuttuni sulerusuppunga.

Gudmundur Franklin, qinersisut 8 procentiisa toqqarsimavaat, qinersinermilu kisitsineq naammasseqqajanngitsoq ajorsarnini nassuerutigalugu.

- Gudni ilaqutaallu pilluaqquakka, Franklin nutaarsiassaqartitsivik AFP-mut oqarpoq.

Islandimi misissueqqissaartarfimmi gallupimi inuit isumaanik paasiniaanermi, Johannesson 90 procentimik taaguunneqarnissaa ilimasaarutigineqarpoq.

52-inik ukiulik Gudni Johannesson, oqaluttuarisaanermi professoriuvoq, Islandimiunit 364.000-it missaanniittunit qinerneqaqqippoq.

/ritzau/