Islandimi pisortatigoortumik naalakkersuisunngortitsilerput
Islandimi Socialdemokratit partiilu De Venstre-Grønne pisortatigoortumik ullumi naalakkersuisunngortitsissapput, Jóhanna Sigurdadóttir ministeriuninngortinneqassalluni. Aviisimi Berlingske Tidendemi ullumi saqqummersumi taama allaaserinnittoqarpoq.
januaarip 31-at 2009 13:37
Partiit taakku marluk unnuaarullutik ulluni kingullerni isumaqatigiinniarput, maannali tassa tusarparput ullumikkut isumaqatigiissuteqartut naalakkersuisunngortitsissallutillu.
Naalakkersuisunngortut arlalitsigut oqaluttuaassartassaqassapput. Siullertut oqaatigineqarpoq arnat angutillu naalakkersuisunngortut amerlaqatigiissasut.
Aappaatullu taaneqarsinnaavoq Jóhanna Sigurdadóttir tassaaginnassanngimmat Islandimi arnani siullersaalluni ministeriuninngortoq, aammali tassaasoq suiaassuseqatiminik atoqateqartartuni nunarsuarmi siullersaalluni naalakkersuisunut siulittaasunngortoq.
Aningaasaqarnikkut ajornartorsiorneq pissutigalugu Islandimi naalakkersuisooqatigiit ataasinngormat ajalusoorput, ministeriunerlu Geir Haarde tunuarluni.
