Islandimi nuna sajuppoq

Islandimi nunap sajunnera richerip uuttuutaa malillugu 6,1-imut uuttorneqarpoq. Pisiniarfinni pisiassat ilisivinniit nakkaasimapput, inunnillu ajoqusertoqarsimaneranik nalunaartoqanngilaq. Nunap sajunnera Reykjavikimiit kujammut-kangimut 48 kilometerisut ungasitsigisumiittoq, amerikamiut ujarassiuut nalunaarutigaat.
Allattoq Louise M. Kleemann
maajip 29-at 2008 12:18

Nutaarsiassaqartitsivimmi suleqaterpoq Inga Hansen maanna Islandimiittoq nuna sajutsiaannartoq oqaloqatigaarput.

- ½ time siornatigut nuna sajukkami oqaatigineqarpoq sajunnera 6,1-imik richter-skala malillugu sakkortussuseqartoq. Reykjavikimi malugivarput, tassa illumi isersimaffitsinni illutaa sajoriataarami. Isumaqaraluarpunga biilit aporpallattut. Kisianni sajoriarmat oqarfigineqarpugut anissasugut, taava 15 minutsit missaanni anivugut. Kisianni annertunerusumik susoqanngilaq, sajuginnarpoq, Inga Hansen oqaluttuarpoq.

- Reykjavikip kangiani sumiiffiit ilaanni pisiniarfimmi pisiassat nakkaasimapput. Reykjavikimiit kangimut 12 kilometerisut ungasitsigisumi. Nutaarsiassami massakkut assitalerlugit takutinneqalerput, sumiiffiit ilaanni aqqusernit putusimasut, quppanitsiterlutik.

Aamma oqaatigineqarpoq sajunnerit kingunerisaanik sajoqqilaarumaartoq, kisianni naluarput qaqugu, Inga Hansen oqarpoq.

Ajunnginnerarpoq, oqarluni innuttaasunit nunap sajunnera eqqissisimasumik tiguneqartoq.

- Taamaallaat maluginiarparput sajoreermat Islandimiut radio tusarnaapallakkaat susoqarsimanersoq paasiniarlugu. Inga Hansen ualiartoq Islandimiittoq oqaloqatigigatsinni taama oqarpoq.

Islandimit nutaarsiassat kingulliit malillugit inunnik ajoqusertoqarsimavoq, ajunaartoqaranili. Sanaartukkat arlallit, soorlu aqqusernit, illut ikaartarfiillu arlallit ajoqusersimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq