Islandimi nualluummik tunillatsittoqaqqimmat sukannernerusumik aqutsisoqalertoq
Islandimi coronavirusip tuniluutipallannera pinaveersaarniarlugu sukannersumik aqutsisoqalerpoq. Tamanna pivoq nualluummik tunillatsissimasut allat marluk arfininngornermi paasineqarmat.
Arnaq angullugu 50-it 60-illu akornanni ukiullit pineqarput.
Islandimi nutaarsiassaqartitsivik Island Monitor taama allaaserisaqarpoq.
Inuit arfinillit ippassaq tallimanngornermini misissorneqarmata aamma tunillatsissimasut paasineqarpoq taamaalilluni katillugit Islandimi tunillanneqarsimasut 45-ulerlutik.
Islandimi coronavirusimik eqqugaasut Italiamut Østrigimullu sisorariarnerminnit tunillatsissimanissaat ilimagineqarpoq, tamarmilli napparsimarulunngitsut paasissutissiissutigineqarpoq.
Nualluutip tuniluutipallannerata kingunerisaanik aaqqissuussat inuppassuarnik peqataaffigineqartut suli inerteqqutaalinngillat, taamannalli aalajangiisoqarnissaa ilimanarsilertortoq oqartussat oqaatigaat.
Danmarkimi coronavirusimik tunillatsissimasoq siulleq februaarip 27-ani paasineqarpoq. Ullullu qulingiluat ingerlaneranni, tassa maannamut, inuit 27-t tunillatsissimasut nalunaarsorneqarput. Nualluut Danmarkimi suli toqqutigineqanngilaq, tunillatsissimasutullu paasineqartoq siulleq maanna aaqqereersimalersoq DR allaaserisaqarpoq.