Islandimi arnat kisitseqqissaareertoqarnerani amerlanerussuteqartussaajunnaartut

Arnat Islandip inatsisartuinut Altingetimut ilaasortaaffinni 63-ini 33-nut qinigaasut Islandimi qinersinerup inernerata takutikkaluarpaa.

Arfininngormalli taaguussinernik kisitseqqissaartoqareersoq qinersineq allamik inerneqarpoq.

Arnat 30-t angutillu 33-t inatsisartunut ilaasortanngussasut kisitseqqissaarnerup inernerata takutippaa.

Islandimi tv-qarfik RÚV taama allappoq.

AAMMA ATUARUK Islandimi qinersineq: Arnat inatsisartuni amerlanerussuteqalertut

Islandip avannaata-kippasissuani naligiiffiungaarmat, taaguussinerit kisinneqaqqittariaqarsimapput.

Kisitseqqissaarneq sunniuteqarujussuarpoq, ilaasortaaffinnullu qulingiluanut Islandip ilaanut arlalinniittunut allannguisoq, RÚV allappoq.

Partiit qinigaatitaasa amerlassusaannut allannguinngikkaluartoq, kikkut inatsisartunut ilaasortanngussanersut pillugu allannguilluni.

Islandilli avannaata-kippasissuaniinnaq kisitseqqissaartoqassanngilaq.

Nunap aamma kujasissortaani taaguussinerit kisinneqaqqissaassasut, RÚV ullumi ataasinngornermi allappoq.

Islandip naalakkersuisoqatigiivi qinersinerup kingorna amerlanerussuteqaannassapput.

Maanna ministeriunerusoq, Katrín Jakobsdóttir, naalakkersuisoqatigiinnut siuttuuginnassanersoq nalunarpoq. Aamma naalakkersuisoqatigiit ingerlaqqiinnassanersut nalunarpoq.

Partiit akornanni pissaanerup allanngornera tamatumunnga pissutaavoq.