Islandimi aningasarsiorneq ajutuuissinnaasoq aarleqqutigineqarpoq
- Islandimi aningaaseriviit nunanit allanit annertuumik atorniarsimanerat ajornartorsiutaavoq. Islandimiummi naalakkersuisuisa taamarsuaq taarsersuinissartik ajornakusoortimmassuk.
Ajornartorsiulernermut ilaatigut patsisaavoq, Islandimiut koruuniata nalinga appariarujussuarsimammat. Islandimiut aningaaserivii Euronik, dollarsinik tuluillu pundiinik taarsigassarsiniangaatsiartarsimapput. Islandimiullu koruuniata nalingata apparujussuarneratigut taarsigassarsiat taarsersornissaat ajornakusoortorujussuanngorpoq, Jesper Rangved oqarpoq.
Islandimiut Danmarkimi aningaasaliissuteqangaatsiarnikuummata, apeqqutigineqarpoq, tamanna Danmarkimut sunniuteqassanersoq.
- Islandimiut aningaaseriviisa aningaasarsiornikkullu ingerlatsiviisa Danmarkimi aningaasaliissutigisimasatik tunisariaqalissagaat naatsorsuutigineqarsinnaavoq, taamaattorli suli tamanna nalunarallarpoq, Jesper Rangved oqarpoq.
- Islandimiut aningaasarsiornerat maannakkut ingerlanerlioraluaqisoq, oqarsinnaavugut Islandimiut aningaasarsiornerat nukittuujummat, tassa innuttaasut ataasiakkaat isertitaat aallaavigalugit naatsorsuinermi Islandimiut nunarsuarmi normu 6-iummata. Aamma pisortanut akiligassaqarpallaanngillat, pinngortitarlu iluaqutiginiartuuaat, soorlu erngup nukinganik nukissiorfeqarlutik nunallu iluaniittumik kiammik atuilluartuullutik, taamaattumik maanna ajornartorsiornertik anigorsinnaassaqqaarpaat, Jesper Rangved naggasiivoq.
Nutaarsiassaqartitsiviup Ritzauip maanna nalunaarutigaa, Islandimiut ministeriunerata maanna oqaatigisimagaa, Island aningaasarsiornikkut ajutuuissinnaasoq.
- Nunap aningaasarsiornera nunarsuarmi tamarmi aningaasarsiornermit eqqugaariaannaavoq naalagaaffillu aningaasarsiornikkut ajutuuissinnaavoq, Islandip ministeriunera Geir Haarde, Reykjavikimi unnummut inatsisartunut taama oqarpoq.