Islandimi aningaaseriviup pisortaa tunuaqqusaagaluarluni piumanngilaq
Islandip aningaasarsiornikkut ajortoorluinnarneranut David Oddsonip inissisimanera pisortanit naalakkersuinikkullu suliaqartunit isornartorsiorneqaraluarluni Odsson tunuarnianngilaq.
Islandimi ministeriunerup Johanna Sigurdardottirip Oddsson tunuaqqullugu kajumissaarsimavaa, taamatullu Islandip centralbankiata nutarterneqarnissaa naalakkersuisut siunnersuutigalugu.
David Odssonip allagaani centralbankip nittartagaani pisortatigoortumik saqqummiunneqartumi, statsministeri, Oddsenimit isornartorsiorneqarpoq.
Suliassat uannut suliassiissutigineqartut suliariuaannarpakka aamma maannakkut taamaaliussaanga Oddson oqarpoq.
Island oktoberip qaammataani aningaasarsiornikkut ajalusoorpoq tamatumalu kingunerisaanik innutaasut akerliussutsimik takutitsisaqattaarput, ingammik David Odsson iluarinagu akerliussutsimik takutitsillutik.
Islandimi inatsisartunut qinersisoqassaaq apriilip qaammataani, qinersinissallu tungaanut annertuunik suliassaqarpoq, suliassat annersarissallugu Islandimi aningaaseriviit ingerlalluaqqilernissaat suliassaallutik.