Islandimi aningaaserivissuup pisortaa tunuarumanngilaq

Islandimi aningaaserivissuup pisortaata, David Oddsonip, tunuarnissaa ministeriuninngorlaap Jóhanna Sigurdardóttirip piumasarigaluaraa, inuttaa tunuarumanngivippoq. Nutaarsiassaqartitsivimmit Ritzauimit tamanna ilisimatitsissutigineqarpoq.
februaarip 25-at 2009 17:28

Atsiornikkut isumaqatigiissut malillugu David Oddson aningaaserivissuarmi ukioq 2012-ip tungaanut pisortaasussaavoq, siusinaarlunilu suliunnaarusunngilaq.Oddson isumaqarpoq, ikaarsaariarnermi naalakkersuisunngortut Jóhanna Sigurdardóttir siuttuliullugu alla suliarisimangikkaat nammineq soraarsinnissani, uffa Islandip ajornartorsiutai pingaarnerutittussaagaluarlugit.

Aamma paasisinnaanngilaa aningaaserivissuaq nutaamik pisortartaanngitsorluunniit naalakkersuisut soraarsinniarsarimmanni. Taamaammat David Oddson suliinnarpoq.

- Nunat siuarsagassat taarsigassarsiniartarfiat, IMF, ukiarmili ataatsimeqatigalugulu isumaqatiginiaqattaalerpara. Taamaammat paasisinnaanngilara sooq uani sapaatip akunnerani soraassanerlunga, David Oddson nutaarsiassaqartitsivimmit Ritzauimit issuarneqarpoq.

Nunat siuarsagassat taarsigassarsiniartarfianit aallartitat aqagu Islandimut tikittussaapput, taakkulu tikilluaqqunissaannut David Oddson piareersimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq