Islandimi aktiat nalingi apparujussuarput
Aningaasaqarniarnikkut ajornartorsiutit, Islandimik ajorluinnartumik eqquisut pissutaallutik, aktianik niuerfiit sisimanngormalli matoqqatinneqarput.
Aningaaseriviit annerit pingasut Glitnir, Landsbanki aamma Kaupthing naalagaaffimmit maanna aqunneqalerput.
Atorfilittat Islandimeersut maanna Ruslandimiipput, aningaasarsiornermik ingerlatsiviit annaanniarnissaat pillugu aningaasanik atorniarnissaq isumaqatigiinniutiginiaramikku.
Euro-t 4 milliardit, tassa 30 milliardit koruunit missaat, atorniarneqarnissaat siunniunneqartoq Islandimi naalakkersuisut atorfilittallu siornatigut nalunaarutigereerpaat.
Russit atorfilittaasa oqaatigaat suli isumaqatigiinniartoqanngitsoq, atorniarsinnaanissaalli ammaffigalugu.
Islandimiut atorniarsinnaanissaat pillugu isumaqatigiinniarnerit aningaasaqarnermut ministereqarfimmi Moskvami ualeru aallartinneqassasut ilimagineqarpoq.
