Islandimi akerliusut aningaaserivimmut isaapput

Inuit hornorujulippassuit Islandimi aningaaserivimmut ippassaq isaapput, aningaasarliorneq naalakkersuisut iluamik akiorniarsimanngimmassuk kamaatigalugu akerliussutsimik takutitsillutik. Nutaarsiassaqartitsivimmi Ritzauimi taama allaaserinnipput.
Allattoq Louise M. Kleemann
decembarip 02-at 2008 08:18

Islandimiut tusindtilippassuit sapaatip akunnerata naanerani isseqisoq aamma akerliussutsimik takutitsipput, ministeriunerup Geir Haarde-p, tunuarnissaa piumasaralugu.

Akerliussutsimik ippassaq takutitsisut aningaaserivissuup silarlianut isaallutik nipitoqalutik piumasaraat, aningaaseriviup pisrtaanera, David Oddsson, aamma tunuassasoq.

Angutit taakku marluk, Geir Haarde aamma David Oddsson aningaasarliulernermut, aningaaseriviup aningaasatigut ajutuuissorneranut Islandillu taamarujussuaq akiitsoqalerneranut akisussaasuunerarneqarput.

Ajornartoornerup ilaatigut malitsigaa Islandimi kronip nalingata qaammatit aqqaneq-marluk ingerlanerinnaani sisamariaammik nalikillinera.

Island aappaagu 2009-mi ilungersunartorsiussaqaaq, aningaasaqarneq 10 procentimik annikillissangatinneqarpoq suliffissaaleqisullu sisamariaammik amerlissangatinneqarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq