Islandiinnaanngitsoq aammali Kroatia Albanialu ilaasortanngoqquaat
Islandip EU-mut ilaasortanngorniarluni qinnuteqarnermini Kroatia, qangali ilaasortanngorniarsarisoq, qaangissagaa nunat EU-p kujammut kangisissuaniittut ernummatigaat. Aamma Albania, taassumami EU-mut ilaasortanngorniarluni qinnuteqaatini qaammatit pingasut matuma siorna tunniuppaa, sulilu akineqarani. Islandilli qinnuteqaataa Bruxellesimut ullut quliinnaat matuma siorna nassiunneqarpoq, suliarineqalereerlunilu.
- Isumaqarpunga Island akuerissagipput, aamma Kroatia Albanialu, Østrigimi nunanut allanut ministeri, Michael Spindelegger, ippassaq oqarpoq, nunanulli allanut ministerit ataatsimiinneranni tassa taperserneqanngilaq.
Ersaripporli Islandip tuaviornerpaamik ilaasortanngornissaa ilaatigut Danmarkimit neriuutigineqartoq.
- EU-mik suleqateqarnermi Islandip peqataanissaa pisariaqarpoq. Danmark Islandilu sorpassuartigut isumaqatigiittarput, Islandilu EU-mut ilaasortanngoraluarpat Nunat Avannarliit ataatsimoorlutik EU-mik ineriartortitsiniarnerat periarfissaqarnerulissagaluarpoq, Kristoffer Klebak, Danskit Bruxellesimi Suliffissuaqarfianni siunnersorti, oqarpoq.
Kristoffer Klebakip ilutigalugu neriuutigaa, Island EU-mut ilaasortanngorpat Norgep ilaasortanngortinniarnera ilungersuunneqarnerulissasoq, Nunat Avannarliit EU-mut ilaasortat taamaalillutik tallimanngussagaluarmata, maannamut pingasuinnaagaluarlutik - Danmark, Sverige Finlandilu.
