Islandi takornarianit ornigarneqarluarpoq
Nunarsuarmi aningaasaqarnikkut ajornartorsiorneq Islandimiunut sakkortuumik eqquivoq. Qeqertarmiulli ajortuinnarnik misigisaqanngillat, tassami takornariarpassuit Islandip koruuniata nalikillerujussuarnera iluaqutiginiarlugu, amerliartuinnartut tikerarput, aviisi morgunbladid allaaserinnippoq.
Allattoq Louise M. Kleemann
Timmisartuutileqatigiiffiup Icelandairip ilaasunik avataaneersunik angallassinera, siorna piffissap taamaalineranut sanilliullugu marloriaammik amerleriarpoq, soorluttaaq Iceland Express aamma taama misigisaqartoq.
Takornariaqarnerulerneq Islandimi takornariaqartitsiviit suliniuteqarnerannik peqquteqarpoq, tassami Islandip koruuniata nalikinnerulernera paasinarsimmat takornariaqartitsiviit avammut ussassaarinerulermata, tamannalu iluaqutigilluarpaat.