Island takornariarfissaqqinnerpaaq
Island piffissami kingullermi imaannaanngitsorsiorpoq. Siullermik aningaasaqarnikkut ajalusoorpoq, kingornalu innermik anitsisartoq anitsivoq arsakunillu ajornartorsiortitsigaarluni.
Taamaakkaluartorli atuagassiaq Lonely Planet, takornariarfissanik piukkunnartunik allaaserinnittartoq, pisimasunik sunnerneqarsimanngilaq.
Atuagassiammi ukioq 2010-mi Island nunarsuarmi takornariarfissaqqinnerpaat ilaattut toqqarpaa.
Taamaalilluni Island takornariarfissanut akimanernut ilannguppoq, tassami takornariarfissatsialattut toqqagaasut Lonely planet malillugu sisamaannaammata.
Islandip saniatigut nunat takornariagassaqqinnerpaatut toqqarneqartut tassaapput Kenya, Afrikap kujataa aamma Russit qeqertaasaat Kamkatcha.
Lonely Planetip Islandip aasaanera takusassaqqissutut, Islandimi nunaannarmi biilerneq, qaqqani pisuttuarneq tatsinilu uunartuni nalunnguarneq takornariarusuttunut ussassaarutigaat, aammalu qilanngat ineqarfiinut takornariarnissaq innersuussutigalugu.
